في اليوم التالت قولت اروح لمحمود زميلي في الورشة احكيله عن كل حاجة حصلت لانه كده كده فاضل يوم واسبوع اجازته يخلص وبالفعل روحتلو.... خبطت على باب شقته بس مكنتش لاقي رد وفضلت انادي وبردو محدش بيرد...الراجل اللي ساكن فوق محمود طلع على صوتي وبيقولي ان محمود وعياله ومراته مختفيين بقالهم 3 ايام ومش عارفين عنهم حاجة بس انا قلقان لان في اليومين اللي فاتو دول كنا بنسمع صوتهم وهما بيتخانقو وكان صوتهم عالي بطريقة فظيعة ده حتى نزلت انا عم شوقي جارنا عشان نهدي الموضوع شوية بس محمود مكنش بيسمع حد وقفل الباب في وشنا ودخل كمل الخناقة وفي اخر ليله الخناقة استمرت لحد ٣ الفجر وبعد كده انتهت بصمت مفاجئ ومشوفتش حد فيهم تاني....الراجل خلص كلامه وانا استأذنته وروحت....مبقتش عارف الاقيها منين ولا منين من ناحية الجثة اللي في الورشة وهروح في داهية بيها ولا من ناحية زميلي اللي مختفي من تلات ايام ومحدش يعرف عنهم حاجة.......انا كده خلصت فقرتي وهرجع اكمل حكايتي تاني بس هسيب مريم اختي تحكيلكو قصتها مع قبر الملاعين ..... في اول يوم كنت رايحة اودي الاكل لهشام في الورشة بس الوقت كان متأخر ومفيش مطاعم قريبة من الورشة فكان لازم اروح انا اديله الاكل المهم اتحايلت على نور عشان تيجي معاية واخيرا وافقت خرجنا من البيت قبل ماما متصحى وكنا ماشيين بنتكلم وبنضحك وكنا داخلين على طريق الترب بس سمعت صوت خبط وتكسير كأن حد ماسك شاكوش وبيكسر حاجة انا ونور بصينا لبعض وكنا مرعوبين من الصوت وخوفنا حد يطلع علينا يخطفنا..وصوت الخبط وقف...نور بصلتي وقالتلي انا خايفة يلا نجري بسرعة...لسة بقولها يلا سمعنا صوت حد بيعيط...مستنتش وبدأنا نجري بس اللي وقفنا عن الجري ووقع الاكل من ايدي هو سماع صوت صرخة قوية بعديها صوت فرامل عربية واخيرا صوت الخبطة....مسكت ايد نور وبشدها عشان نمشي بس هي ثابته مكانها وسيبتها ومشيت....روحت خبطت ع باب الشقة والباب اتفتح كنت لسة واقفة بره عشان اشوف مين اللي فتح الباب كنت بحسبها رحاب وعايزة تخضني بس لقيت رحاب قاعدة وبتعيط وماما هي اللي طلعت من ورا الباب...اخدت العلقة التمام وبعد كدة ماما سألتني عن نور...قولتلها هتيجي مع هشام وماما الطيبة صدقت ودخلت تكمل نوم وهي مطمنة على بنتها....دخلت انا كمان اوضتي وفضلت اعيط وخايفة على نور ومش عارفة هي وقفت ليه اساسا عدت ساعتين وانا بفكر في الموضوع ده....وفجأة سمعت صوت جاي من ناحية باب الشقة وكان حد بيخبط...دي خبطة نور ..قومت افتح بسرعة قبل اما ماما تصحى وفعلا كانت نور بس كانت باين عليها العياط والدموع مليا عنيها ودخلت في صمت وهدوء لاوضتنا اللي بنام فيها وانا دخلت وراها...نور فيها حاجة عماله اكلمها مبتردش عليا ونايمة وهي ضامة ركبها في صدرها وحالة اول مرة تكون فيها يعني بس انا متأكدة ان هي زعلانة مني عشان انا سيبتها ومشيت....كلمتها تاني وهي مبتردش واكلمها تالت...بعد كدة ردت بس مكانش صوت نور كان صوت ست كبيرة وقالي كلمة واحدة ناااااامي....فنمت وده كل اللي حصل معايا وانا هسيب نور تحكي اللي حصل معاها بس في الحلقة الثالثة....
